L’organizazion des Nazions Unidis e à volût dedicâ l’an cu ven a une realtât straordenarie e vitâl: la mont. Nissune dificoltât duncje a fevelânt e no dome par resons di convignince, ma par resons afietivis e obietivis. Parcè che dut al ven de mont e ducj o vin un rapuart filiâl cu la mont. No ’nd è civiltât, culture o religjon che no vedi relazion cu la mont, viodude come cjase des divinitâts o adiriture come divinitât, e ancje inte nestre vision dal mont, che e partis de Bibie, la mont e à un significât profont. La mont e je viodude come parabule dal nestri vivi e dal nestri lambicâsi. E je metude in alt parcè che dome in alt si pò vê une vision slargjade, complete, globâl de realtât. Lant in mont si fâs fadie, parcè che si à di vinci la fuarce di inerzie, che nus consee la sflacje, e la fuarce di gravitât, che nus tire viers il bas. Inte vite si à di combati e scombati. La mont, tal so misteri, e fâs di puint fra cîl e tiere. Lis sôs lidrîs si sprofondin te scuretât de tiere e la sô spice e rive a penetrâ il cîl. Ancje Mosè al è lât su la mont a cjapâ lis lastris de leç e Crist, te gnove aleance, al à sielzude la mont par proclamâ la gnove leç par une umanitât rinovade e sfrancjade. Intun mont là che dut al zire usance une giostre infernâl, cuntune velocitât incontrolabil e insopuartabil, la mont e reste un pont di riferiment, un pont fêr. Inte nestre sapience popolâr si dîs che «Lis monts a stan fermis e la int e zire». E tal nestri torzeonâ fisic o psicologjic o esistenziâl, la mont e je la ultime robe che si viôt tal partî e la prime che si contemple tal tornâ. Mont come lûc de memorie e dai afiets, come pont di riferiment spirtuâl, culturâl e uman, come scuele di formazion dal caratar. Ma mari ancje in sens naturâl, fisic. La mont e nudris i paris e i fîs e i nevôts, e parturis, e manten, e sepulis lis gjenerazions. Dome partint de mont si pò rivâ a fâ dal teritori di une comunitât un lûc di vite e no un pericul, une risorse e no un probleme. Dut chest nus puarte a lis nestris monts, a cheste corone maiestose che nus cercle di soreli a mont fint a soreli jevât, des monts di Nert, passant pe Cjargne, a la mont Cjanine e al Mataiûr. Un teritori grant, splendit, unic, là che di simpri si è svilupade une civiltât e une culture che si pò clamâle cence nissune retoriche la mari dal nestri jessi furlans e slovens e todescs. Di fat lassù, ancje par vie de posizion isolade e protezude, e à podût conservâsi plui che in altrò la nestre anime plui gjenuine e se si vûl cjatâ ancjemò un spieli o une relicuie dal nestri patrimoni lenghistic, architetonic e antropologjic si à di vê il sintiment e la gracie di bati chei trois benedets e di jentrâ ta chei borcs silenziôs, cjamâts di memoriis. Cualchidun al à dit che in Cjargne lis cjasis a son come glesiis e lis glesiis a son come cjasis. Cheste part di mont che, te sô puaretât, e à nudrît miei che e à podût la nestre int par secui, e je jentrade in crisi tal moment che il Friûl, pe prime volte, al à cognossût un fregul di bondance cu la rivoluzion industriâl e cu lis gnovis possibilitâts e prospietivis di une economie vierte e moderne. Chest al sta a dî che e je mancjade, tant a nivel statâl che a nivel regjonâl, une politiche specifiche pe mont. Si trate di un pecjât di chei cu la code, che a scualifichin cence apel une classe dirigjent. No dome parcè che la prime atenzion di une classe politiche oneste e competente e à di lâ ai plui debui e no ai plui fuarts, ma parcè che bandonant e tradint la mont si met a riscjo dute la regjon. No dome si piert une ricjece ancje dal pont di viste agricul e turistic, ma si rosein lis fondis che a tegnin sù dut l’implant. Cheste mancjance di atenzion pe mont, e pe int che e vîf venti sù, e palese une mancjance di sensibilitât e di culture, di agrât e di inteligjence, di sintiment e di cussience. Une latitance che e rivuarde tant il mont civîl che il religjôs e che no si pò suiâle cuntune cunvigne fate ogni tancj agns, là che di gnûf e je dome la tabele anagrafiche che e segne i ultins batits di une malât terminâl. Ancje la cunvigne fate de Arcidiocesi di Udin tal novembar dal 2000 no à parturît plui de classiche surisute: un libri di numars e di buinis intenzions. Soluzions a ’nd è. Bisugne vê la volontât, la fantasie e la creativitât di cjatâlis. A ogni cost. Parcè che la muart de mont e je une tragedie che no si rive a misurâle, come che no si rive a misurâ lis conseguencis par ducj. Di altris bandis, int plui savie e cussiente e à savût cjatâ il mût di lassâ la int là che e je nassude e cressude e la mont e je deventade une benedizion e une fortune par dute la comunitât. Tra lis soluzions si cjapâ, siguramentri une e rivuarde l’istituzion de provincie cjargnele e, de bande de glesie, la restaurazion de diocesi di Zui, cuntun vescul che al vîf in Cjargne. Po a son lis provedencis, lis precedencis, lis indenitâts, i investiments, lis gnovis possibilitâts imprenditoriâls e artesanâls che siguramentri i esperts a cognossin. Se no lu san, che a fasin un salt venti sù pal Sud-Tirol o in Carintie. Come cristians, nô o crodìn inte resurezion e duncje lis borgadis de Cjargne e des Valadis di Resie e de Tôr e dal Natison a podaressin tornâ a jessi ripopoladis ancje daspò de lôr sparizion. Ma al è di stupits e di criminâi spietâ un meracul e sfidâ la potence di Diu cuant che, doprant il sintiment, la cussience e la competence, o podin tornâ a la nestre mont une part ancje minime di dut ce che nus à dât a ducj in ducj chescj secui. Parcè che ducj, dal prin al ultin, o sin in debit cu la mont.

Antoni Beline, diretôr dal mensîl "la Patrie dal Friûl"

(n. 12 - Decembar 2001 www.friul.net)


< Torna alla pagina di dicembre