Gnovis furlanis te rêt des rêts Su www.friul.net il “Dizionario biografico” e il boletin “InformeOLF” Internet e je pardabon une risorse pai furlans e pe lôr lenghe. A son plui di 2 mil chei che ogni mês a jentrin a dâi une voglade al sît www.friul.net, il lûc-web che “la Patrie” — in gracie de opare preziose di Indrì Pironio — e à inmaneât za fa 2 agns. Un sucès ch’al cres dì par dì, ancje midiant des novitâts che cun costance si cîr di meti sù pai netris letôrs. Tai ultins mês l’impegn a pro di chest gnûf strument di comunicazion al è stât grandonon. In gracie de disponibilitât di Zuan Nazzi, si à podût publicâ la I edizion dal “Dizionario biografico friulano” (1992). Un’opare ch’e cjape dentri centenârs di biografiis di furlans di îr e di vuê ch’a an lassâts une olme, piçule o grande, te storie. La version internet dal dizionari e je dal sigûr plui comude dal volum a stampe. Un motôr di ricercje al jude a burî fûr intun lamp il non che si cîr. Un’altre novitât il gnûf spazi dedicât a “InformeOLF”, il boletin di informazion dal “Osservatori regjonâl de lenghe e de culture furlanis”. Tal sît si cjate l’interie colezion dal boletin (in zornade di vuê 5 numars) cun ducj i articui, metûts in linie cu la permission de Regjon Friûl-V.J. Il sît al vûl jessi une prime ocasion par meti dongje ents, clapis e grops che su www.friûl.net a podaran cjatâ bon acet. Un’ultime vore e je stade la ricolte des leçs e des normativis — de Regjon, dal Stât talian e de Europe — ch’a rivuardin la lenghe furlane o ben lis lenghis di minorance. Pal avignî si prossume di slargjâ il numar dai “e-libris” — venastâi dai libris in formât eletronic che si puedin lei midiant dal computêr — e di un “svelt” dizionari plurilengâl par chei ch’a “passonin” pal web e che ur covente un jutori pe traduzion de lenghe furlane. La Patrie dal Friûl < Torna alla pagina di agosto