| |
| In main Oubarlont |
Laichtat da suna in himbl,
ii sizz avn schteig van Pichl,
tua zua da aung unt loos as mai gadonckn
hintar vloutart in da zait.
Bos sichiden?
Gonz ondarscht is mai Oubarlont,
an haufa lait,
an haufa chindar as schraiant
unt schpilnt afta beiga.
Afta Schiit dar Hans unt da Dorina
sizznt voratiir,
baitar dort dar Aldo zintat a pizzl bidar oon.
Petat an Votar Unsar da Ida
voarn chraiz van Letischn,
nor geaza schian schtildar
in fila par Marian van Mot.
Zuachn pan maiarlan schteat dar Salvatore,
da Sunta, da Maria, dar Festo
unt reint van viich asa geistar
in d’olba hont pfiart.
Min choarb avn ruka da Lina griast
unt binct oln a guata nocht.
Oum pan Kon da Luzzia riart da plenta
unt dar Dante boschzi da henta.
Rostat da Delaida avn panchlan,
darbaila dar Pino tuat houbl
unt saina Ornella in da chuchl
richtat da ckropfn.
Tuanza tonzn pan Bakon?
Na, is lai dar Giovanni
as richtat saina gaiga.
-Tui, tui!- da Rosina van Millepezzi
riaft zoma saina hinta unt saina chozzn.
Ola in fila seem pan Kreccar
dar Gildo, da Luzzia, dar Peatar, da Marga,
da Frida unt da maeschtra Rosina.
Vor sain haus schteat dar Tavio,
ear is plint, lisnt unt griast
bearda schtildar virpaai geat,
nor riaftar in Giordano
unt in Sisto as zeibarsta kleva
tuant rostn.
Da Fina unt da Olga
puzznt da maina,
dar Sghuanut ckert da schtreta,
unt da Paula avn venstar
boartat as sai Otto van Scholeit hintar geat.
Is polda vinstar men da Elsa, da Rita, da Alda van bisn
miadigar zuar chemant.
Mai traam is verti,
maina aung senant oufa.
Amboi isten asou schtila?
Prava, lustiga lait doo sichtmar niamar,
ola sent varschlofn in eabickaitn rua.
Bearda nouch leipt schaukt oon
da haisar, da maiarlan, da beiga,
da schtretn as laar senant varpliim.
Volt nidar da nocht,
ii schaug da schtearna in himbl
unt lisn da sghbalblan
as nouch tuant prumbl untara dachar
va main Oubarlont. |
|
|