Bear hotten niit gackent in Claudio van Sappadin mendar schafeer var korriera is gabeisn? Ola homar ganousn va saindar schpasickait unt nouch in haint tuatar gearn rein unt norazn mitt junga unt olta. Ma meik niit vargeisn zan soon as, men deiga zaiting ausar is cheman, ear hott in earschtn priaf af tischlbongarisch criim ona schonta, ols baldar gearn hott saina schprooch unt houftat asa beart paholtat in da zait. Dar Claudio unt saina vrau da Pasqua, mensa meink, tuanza gearn zua helfn in doarflait, soiara hama is olabaila oufa vir ola.Hiaz tuamar leisnan bosuns dar Claudio hott darzeilt va sain leim.
C:- Mai votar is dar Bepi van Sappadin gabeisn, odar dar Bepi var korriera, maina muatar da Ida van Schtinn. Va chlanat pini in da schual gongan unt cnochz homar main tati gaboartat mittar korriera, noor hottaruns aufar pfiart pis seem pan haus var Brigidan, noor hintarisch oachn unt aichn in garaasch bo hiazan da sghmidaraai iis van Massimo unt van Pierino. Seem, mitt viarzachn joar, honi onckeipt zan learnan gian mittar korriera, da see mool honza an "Mann" ckoot as da taicn saldotn hintn hont ckoot glosn cbint nochn chria. Noor honi onckeipt af Schunvelt zan gianan, pan Rupil, da oarbat learnan abia mekanik unt cnochz pini in da schual gongan pan Don Bosco. Niit obla avndoo zan gianan, pini gongan sghlofn mitt an oltn mandlan avn mauf, in haus var Esteriin as pfraintat is gabeisn min Klement. Maina muatar hottmar mita geim is eisn asi niit viil scholat vartuanan. In sumar, in abbonament zan vardianan, pini mitt main tati gongan zeidalan mochn afta korriera. Is 1952 pini vir drai monat af Lignan gongan unt a monat af Lienz mitt main tati, bal da see mool senza va Schunvelt af Lienz gongan. Va seem pini a joar gongan oarbatn af Matera, min schkavatoors, is dar Toni van Jergl a gabeisn. Is 1956 in otobar, pini in da Sghbaiz gongan noor honi da Pasqua gackent as va Verona iis unt is 1959 homar chaiartat. Inols saimar vurt pliim andlaf joar, is 1967 pini hamm cheman unt hoon is plozz va main votar ganoman unt hoon in schafeer gamocht pis is 1992 meni in penschion pin gongan. Inols honi viarzk joar goarbatat!-
L:- In onvoon, da korrieras senza um ola da schtuntn gongan abia hiaz?-
C:- Naa, va Tischlbong is ana abeck um sezza indarvria unt is hintar cheman um ochta cnochz. Um mitoo is ana abeck va Palucc unt is gongan pis af Bain. Mitt lautar schtraitn saimar zareacht cheman zan hoom a korsa mearar, da see va sima unt vinvazbanzk indarvria, vir da chindar var schual. Darnooch honza noor onckeipt zan varlengarn da raas pis heroum, vir chamoutickait vir da lait unt hiaz sent bool korrieras as lafnt um ola da schtuntn. Va Tischlbong saimar in draai schafeers gabeisn: ii, dar Fiorino unt dar Angelo van Beec. Pis is 1953 as da SAF is gabeisn honza in garaasch herumpn ckoot, darnooch da S.G.E.A. hott in grunt var Virginia var Zeeln gachaft, noor glabi is 1958 honza gapaut in nojan garaasch-
L:- Hozzenck gapfolt in schafeer mochn?-
C:- I hoon gearn gamocht da see oarbat, hiaz tuami inaan antraman. Hottmar gapfolt norazn min lait, min chindar schpasn sustar honzadar ckaan vriid glosn. A mool, is in earschn apriil gabeisn, honi da chindar gamocht schiam da korriera van Bar pis in da raida var Nezzbraida, asou zan schpasn. Noch da penschion dar Don Attilio hottmar pfrok a hont zan geim in da chircha, asou mochi a pisl in meisnar, schaugi dar Eveliin zan helfn. Doo in haus unt druntar in goartn, ols bosta sicht honi alana gamocht, ii tua obla oarbatn-
L:- Bos dencktisden var schprooch?-
C:- Mittar schprooch muasmar virchn gianan, bosi meig schraibi bool vir da zaiting. Houfmar zan paholtn da schprooch, lait sent obla bianigar, ovar da chindar scholatn da schprooch rein!-
L:- Beltis nouch eipas soon in lait as leisnant unsara zaiting?-
C:- Oln in lait binci glick, sein, zunt unt asa leisnant unsara zaiting, bal dar Silvano, mai pruadar dar Nicolò as in Auschtralia leimp, mensa da zaiting pachemant noor rearnza, dar sghmearz van doarf is groas, maina sghbeistar da Milena as af Genova iis, dos glaicha. Meikst guat plaim bi viil asta bilst ovar daina hama is laai ana. Meni in da Sghbaiz piin gabeisn honi niit da zait darboartat hamm zan cheman, ii hoon a groasa peta ckoot va main pearga, va main doarf, valtar ols unt verti!-.


< Torna agli articoli del n. 39