In herbast pini bidar ina schual gongan unt bidar in da earschta polt asi nitt hoon gameik verting is voadara joar. Da leararin is va Trep gabeisn hott Ernestina ckasn unt is a guata leararin gabeisn unt voula gadult leistla mitt miar. In bintar pini pa maindar noon gongan eisn un mittog, unt mai neni Hans hott niamar mear pfertigat zan soong maindar noon zan schaung meni bool ganua hiat ckoot geisn unt hott olabaila soarga ckoot asi nitt ganua hiat ckoot. Cnochz memar nor hamm saim gongan par Soga saimar biani mool ibarn beig gongan, is maista saimar ibara leitn oachn gongan unt un vischlan mitt an oltn choarb gongan polt as da seeng joarn da Leitn viil seablan hott ckoot unt groasa poccn, asou pis uma sezza cnochz saimar nia dahama gabeisn unt is maista van mool plocc noos ina viasa. Lai ina schual zan gianan, miar var Soga, ii, dar Vero, dar Luigino van Jergl, dar Beppino van Farker, da Antonietta var Taicn, da Franca van Sghosghi, do reidi van seeng va main joarn, hoom viar kilometros in toog gamocht, ona pachlongsi unt ona asou viltar mozz zan traim bisa in haintigis toog tuanant, darzua asa in "minibus" honant asa polda afta haustiir chimp neman unt viarn. Men dar sghneab is ckeman vir uns is sunti gabeisn unt viil mool saimar ina schual gongan min sghlitlan unt homsi gazouchn anidaran schtuck ananondar. Ii gadenckmi asi viil mool in rock va main neni Peatar hoon ongleik vir kapot, unt da erbl senantmar a guata schpona virpai gongan pan henta asisa viil mool hoon gamuast aufschtrafn, unt viil mool senanza guat gongan abia hencjach polt asmar pan St. Sghualt oachn da zopfn ais hoom oar ckrisn as senant boarn ibarn chlopf oar var cheltn, unt homsa gleckt unt zuzzlt abia mensa gjelatos barn gabeisn. Hobs ckreink, gabintat, cniim udar cjauart miar hoom nitt an toog pfalt in schual, unt memar a voula cheltn unt plocc noos saim gabeisn, homar nia chana chronckat auf ganoman unt saim tempriart gabeisn abia dar schtoochl balmar olabaila ina vraian hoom cpilt unt gleip memar aa holba nocknti saim gabeisn. Meni dahama da kompitos hoon gamocht da suntigis unt da pfinstigis unt hoon umin cjauk af Chlalach is is dearfl abia a presepio gabeisn abia ctrichn ibarn pearg aufn. Viil mool da pfinstigis honi zeachn virpai gianan da seeng pelga as ina schual senant gongan af Palucc, unt andar ismar mear abia da ondarn in chopf varpliim, dar Anselmo van Janis as min schkiis is gongan unt min preit van diseng avn oksl as nouch mear hintar hott ckopp, unt hott nouch mear gamuast sghleipn virchn zan gianan. In seeng sumar honanzus "al mare" cickt in kolonia vir zbaa bouchn balmar vaneatn hoom ckoot va jodio, bi da docktara honant zok, unt asou homar da meidlickait ckoot viil noia cichna zan seachn unt zan chenan. Da earschta cicht asmar nia hoom ckoot zeachn is is meer gabeisn, homar zok "Schaug darlai bosta bosar, barbaas bi viil pachar as vaneatn senant asou viltar bosar zoma zan pringan, unt barbaas va bont as ola chemant", cichna as vir uns chindar unmeidlich senant gabeisn zan varschtianan. "Dentifricio Clorodont", anondara cicht asi nia hoon ckoot zeachn, is mear gabeisn in seeng asmar hoom geisn abia in seeng asmar hoom gapraucht da zenda zan boschn polt asar va menta hott gabist. Viil mool in seeng chindar as honant cnorcht da nocht homarin in maul aichn gadruckt unt mear abia a mool homarin min schtinpflan a paitali gamocht min dentifricio drina abia a zuzz van chindar noor aichn in maul, pis asa noor senant aufgabeckt, soi honzi darzirnt unt miar homsi paholfn unt glocht ganua pis as nor da "Signorinas" senant ckeman schaung bosmar onschteiln unt is lerman mochn verting. In dritn toog sok dar Lino van Pua: "Bepino ii gea niamar haam, bal dodan eisi viar mool in toog unt dahama lai zbaa" "Bia viar mool?" sogin ii, as nitt hoon ckoot varschtonan cbint bosar hott gabelt soong, unt ear schian schtaat: "Indarvria baisis proat mittar milach unt kakao udar kafee bosta iis, un mittoo paschtaschuta noor earscht ondars zoi darpai, vlaisch, chaas, radik, kartufulas; un viara nochmitoo da cjokolatins udar da "cremifrutto" min proat, unt noor cnochz bidar abia un mitoo lai as avn plozz var paschta da migneschtra iis; bos bilstaden peisar abia asou?". Ii sogenck da boarchat homi nitt ckeart umreacht zan geimin memar aa dahama nitt in hungar hoom glitn. Bimar bast af Lignan is meer is lai nidar unt a metro bosar zan pacheman muasmar leistla vufzk metros aichn gianan, unt ovar glaich da mencar as af uns honant cjauk hottuns lai glosn aichn gianan pis memar is bosar oubarn chnia hoom ckoot unt nitt a metro baitar unt asou homar goar gameik learnan sghbiman niit, asou saimar oachn unt asou saimar aufar. Suna boll homar darbischt ganua, abia da earschn taga, bais bimar saim gabeisn abia da lailachara, saimar cbint roat boarn a bia da prenta asuns goar is viabar iis ckeman cnochz. Memar hamm sain gongan saimar ola schian praun gabeisn abia da sghborzins, singantar afta koriera: "Macchinista, macchinista udinese metti l’olio nei stantuffi, che a Lignano siamo stuffi ed a casa vogliamo andar". Saim oo cting pan Bar abia oarma hascharlan min unsarn sacklan avn ruka abia memar vreem barn gabeisn in doarf, senant lai zbaa bouchn virpaai gabeisn gongan ovar vir uns hott gadaicht a joar unt da peta hott onckeip zan mochnsi hearn. A schiana cicht dein van kolonias, bosi da chindar da earschta mool alana pachemant ona in votar unt nouch mear da muatar olabaila hintar soian vir aniada cicht, senant chlana cichna ovar learnanti bozzn, learnanti seachn da cichna unt is leim in anondara moniar unt helfntar bozzn ona draufcheman asou bi richti iis. A cicht muasi darzeiln as miar is ceachn cbint asi hamm piin ckeman. Honi darzeilt maindar noon Kavola bi dar ootreit is gabeisn af Lignan unt dar lavandin, da doccia, asmar af Tischlbong nia hoom ckoot zeachn, leistla ii. Cbint darnoch pini avn ootreit gongan unt meni verti hoon ckoot honi da cheitn van bosar zuacht zan ziachn abia af Lignan ovar pan-uns senant da atreita nouch zuachn pan gartlan gabeisn unt min sghbartlinga gabeisn gamocht, unt in bintar men dar sghnea is pfoln unt mens hott ctapp is dar sghnea aichn gongan av ola da saitna pan chlifta, asta host a mool gamuast ols ausar cheern min peisn menda host gabelt af saitn gianan.


< Torna agli articoli del n. 39