In erti nochmitoo, andlaftn setembar, schaunktar da televisghion odar lisntar in aradio, saimar cheman zan beisn bosta in Amerika is passiart. Zbaa aereos honza anpflais gamocht aichn schpringan in da Zbindl Tuurna va New York, a dritar is gongan vertin avn "Pentagono", a viartar, darvoar asar baar gongan vertin avn Baisn Haus, bo dar President Bush plaip, honzin oar cousn unt gamocht vooln in Pennsylvania.
Voar da aung var gonz belt is boarn voarprocht an umvarschtendlicha sochn, ols ainpfiart va tamischa chepfa as ckaan rischpiett hont goar virn selbarn leim niit, as nooch hont gazouchn unt gateatat tausntara umschuldiga lait. Cbint nooch ceachn da amerikans hont schuan gabist as schult van ols is gabeisn dar raichasta arabischa Osama Bin Laden, dar schofar van islamischn asa hott oo cualt zan gachtin da raichn lendar unt mear abia ola da Amerika.
Afta televisghion is boarn gazak da vroickait van islamischn, baibar, mandar, chindar as afta beiga sunti hont gamocht, as ckaan sghmearz hont probiart. Bi meikmarden asou vroa sainan? Asouboos on zan schteiln meikmarsi niit loum, ma meiksi laai schoman voar da gonza belt unt nouch mear voar Goot. Pis in seen andlaftn setembar homar ola darckent da Amerika abia a raichis, schtoarchis, umzicktigis lont, ovar, durch da znichtickait van aan menc ols is zavooln in aan bailalan, durchn rooch as dar Bin Laden hott kein da Amerika, hiaz da gonza belt muast piasn. In vraiti 14 setembar um mitoo, in da gonza Europa, ola homarsi aufckoltn in schtildickait vir draai minutn, cnochz, bearda hott gabelt, hott a cherza ongazuntn afta venstarn van haisar vir ondenck oln in seen oarman lait as umschuldigar sent ctoarm.
Van seen andlaftn setembar meikmar soon as da belt gonz is gabezzlt, da soarga is obla greasar boarn unt ola homarsi zuachn cheart pan amerikans.
Dar Bush hott bool reacht gamant zan rein min islamischn asin scholatn ainhendin in Bin Laden, ovar sooi hontin niit glisnt, hontin niit pfolgat. Asou in sunti 7 otobar da amerikans hont onckeipt zan schiasn in Afghanistan, hott onckeipt is drita belt chria!
Sent niit schiana cichtn bal a chria prink nia eipas guaz, ondara toata, ondara eilatn, berbaas bosmar nouch muasn darleim.
Deiga is a hoartiga zait, is soarga ganua zan hoom bal mensa onheimp kimischa sochn zan schiasn odar zan mochn schpringan, ols beart vargiftat: dar luft, is bosar, is eisn, is menc selbar. Houfmar va niit, houfmar unt petmar Goot as dar vriidn bidar chimp in da gonza belt, as is chria cbint auf heart, as da seen hertn chepfa caidar bearnt, asa varschteanant in groasn valar asa hont gamocht unt varlongant pitavarzaicha in amerikans.
Dein sent laai binziga gadanckna voar da greasickait van an chria, ovar houftn as eipas schians meik passiarn av an too is nia cleacht.
Da oltn hont obla zok, in a hoartickait van leim: "Ols geat virpaai, dosto beart a virpaai gianan!".


< Torna agli articoli del n. 39