Q:- Gapoarn pini is 1922, noor honi maina zbaa priadar dar Miro unt dar Adelmo. Unsar votar is dar Peatar van Macutt gabeisn unt da muatar is Nanali van Poi. Va chlanat honi gamuast in haus helfn unt mitt draizachn joar pini afta Ganzbisa gongan manan mitt maindar muatar unt ondara baibar van doarf. Um viara indarvria saimar schuan ibarlont gabeisn mitt aan choarb schtricka avn ruka unt aan fiaschkos bosar, bal oum in Ckouvl is chans. Da cjamas haai homar mittar teleferika oar cmisn pis pan mainalan, va seem drauf af d’ondara as pis in groom van Scholeit is oar. Haai saimar aa gongan mochn in da Schuparmoo, afta Bisn, Oubarn Raut, ibarool saimar gabeisn. Mitt ochzachn joar ii unt maina lait saim in Taic gongan, mai pruadar dar Adelmo hott oum da schualn gamocht. Goarbatat honi in da fabrik van priaf vir vinf joar. Seem sent gabeisn da ruschn prisghoniirs as da kunetn voar da fabrik hont auf gachrompat, noor honzisa anian too in ckeldar oachn cickt eisn is ploba chraut. Mensa ibara schtian aufar sent gongan, homarin pahambla eipas zan eisn geim, soi sent voula hungar gabeisn, oarman lait, berbaas bosa sent gongan vertin. Da see mool in Taic is dar Dante van Koka aa gabeisn, is Sghuanuttl van Balt, is Bepali van Jega, ondara mandar unt baibar, da mandar mauara unt da baibar hont in da veldar goarbatat-
L:- Saitis noor oum gabeisn in chriazait?-
Q:- Joo, noor mai tati hott niamar gabelt plaim noor saimar cheman. Doo is aa chria gabeisn, men da kosaks sent cheman senza aichn panuns in haus, aufn in da chamar min zontn vrischinga asa hont ckoot ooctouchn, maina muatar hottin schiacha gatonan ovar soi hontar da piksa gazak. Homarin is haus glosn unt saim aufn gongan plaim pan veitar Amadio pis asa sent gongan. Soi hont oldarlaians viich mita ckoot, da baibar hont afta karavanas da chindar gachaft, is oldarlaai gabeisn zan seachn da see mool. Mensa sent gongan honza davoara in toat pacheman, in da Drava, aneitlana honza vurt pfiart, patroum honzisa. Unt doo men is chria hott pfertigat honza da kloukn glaitat, da lait vroa, honza umar crirn: “Is chria verti, is chria verti”. Noor is mai Miro cheman var prisghonia, vinf joar in Engalont hottar gamocht, mai tati isin ankeink gongan pis oachn in Muschkadeal, gonz zoutat isar zuar cheman-
L:- Bona hottisden chaiartat?-
Q:- Is vinvaviarzka honi in Carlo van Letischn chaiartat unt piin dicka gabeisn van earschtn suun, dar Ivano. Miar hoom ols in haus pa miar gamocht unt mai tati hott da gaiga gabelt ovar, is mai sghbogar dar Ido gabeisn ctoarm, ear hott laai zbanzk joar ckoot unt is pan saldotn gabeisn, in da Marina, af La Spezia, honza raschtrellament gamocht unt sent ola toat pliim. Peinsee homar chaan lust ckoot zan tonzn-
L:- Saitis noor doo pliim?-
Q:- Naa, miar saim af Milan gongan bal dar Carlo hott dortan da oarbat ckoot, ii piin dicka gabeisn van zbindlan, dar Oscar unt dar Walter, menisa hoon ckoot zan chafn saimar bidar hamm cheman. Va Milan hottar in motocarro procht noor isar holz unt mist gongan viarn in lait, unt in rekupero ausar pfiart van Earschn Triit. Noor homar da chindar pa maindar oltn glosn unt saim in da Sghbaiz gongan af Basilea vir zbazbanzk joar. Dar Carlo hott in mauarar gamocht unt ii piin in schpitool gongan puzzn mitt viil ondara baibar va Tischlbong. Bartamool saimar hamm cheman pan chindar schaun, noor dar Carlo hott onckeip is haus zan pauan unt is biarzhaus asmar nouch oufa hoom. In da Sghbaiz saimar guat pliim aa memar viil hoom cleipat, meni meachat tati bidar aufn gianan oarbatn-
L:- Hottis niit in asilo aa goarbatat?-
Q:- Da gouta Nuta var Moorn is af Ruam gongan noor hozzami oachn cickt chouchn af sain plozz. I unt da Evelina saim min chearba gongan neman is holz aufn par schual unt oachn gatroon voiar zan mochn, maeschtras sent gabeisn da Rosina unt da Lea. Noor homar da seen groasn peina gamuast raim, da bavarlan van chindar gaboschn unt gongan sghbenzn pan pooch. Asou schaa, vir a toula zait, noor is bidar da gouta Nuta cheman sai plozz darbischn-
L:- Bos dencktisden var belt as hiazan iis?-
Q:- Is ols ondarscht, hiaz schaukti niamp mear oon, vriar is miseria gabeisn ovar mear chamaroccoft, peinsee miar pfolt mear hintar gadenckn afta oltn zaitn, hiaz da belt is laai schiacha!-.


< Torna agli articoli del n. 37