“Griaszmar main Ronach!”. Bi viil mool honi chert soon dos schpriich boart meni va chlanat aichn piin gongan in Ronach mitt main hauslait. Aniada mool asi deen gruas hoon cheart homi pfrok in main siin bosa hont gabelt soon da seen lait as niamar aichn sent darcheman, da seen joarn honi niit varschtonan, laai schpeitarar pini drauf cheman avn groasn sòft van seen bartar. Darvoar oar zan schraim maina gadanckna losi is boart in seen lait asmar gearn eipas hont darzeilt darviir, on zan heim van Flavio van Galo: “ In Ronach is schian gabeisn, saimar toul pliim. Ii unt mai kusghin dar Dino saim laai piablan gabeisn memar schuan inoldarvria aichn saim gongan in Ronach, ols zan gianan schaun bi dai neni da maislan hott darbischt. Isuns niit reacht virr cheman as a plinz menc hiat gameachat maisa darbischn ovar ear is za reacht cheman. Dai neni hott a tiafis talar ganoman, av aan gabalan hottar drauf a prusali proat odar chaas, is talar umagacheart avn gabalan as hott ibarbearz gamuast plaim unt men is maisl is aichn is talar is zua pfoln unt hott laai ausar cpeacht is kadali. Ear hott an schpobat ganoman, gagrifn bo is kadali iis gabeisn, gapuntn, noor ausar gazouchn is maisl unt aichn cloon in eika van schtool pis as iis vareckt noor hottars ibarn Palgroom oachn cmiisn.
Vir uns is a vraida gabeisn asouboos zan seachn, sent an haufa lait drina gabeisn noor hottmarsi paholfn zoma zan plaim. In Ronach is viil, viil schian gabeisn unt verti”.
Hiaz ibarschraibi a chlaa cichtl as voar is cheman dar Teclan van Farkeer unt sii hottmars darzeilt voar vinf joar: “ Baarn nouch da seen zaitn, miar hoom unsars leim seem drina gamocht unt miar saim gearn pliim, miar saim ola chamarotn gabeisn. Noor lisn, lostar darzeiln a cichtl. Darvoar aufn zan cheman pa maindar Hintarackloma, avn poun iis a vaicht, noor honi gadenckt aan nogl aichn zan sghloon auf zan hengan an Heargoot asmi hiat pahiatat meni oachn baar gongan min sghlita, asi niit in cjacca gea, bal is schiacha da cjacca van sghlita, pist cbint druntar. Sghlogi aichn in nogl unt heng auf deen Heargoot as noor aichn is gabozzn in paam. Inamool chimp dar Gino van Glosar - Bos tuastaden?- - An nogl honi aichn cloon in Heargoot auf zan hengan- - Basta asmar niit meik da seen cichtn tuanan, bos tastn duu soon menidar an nogl aichn taat sghloon in oarm?- - I taat a pisl rearn noor tati bool peisar bearn, asou dar vaicht, mitt sain peich beartar bool bidar peisar-. Mendar asou hott cheart isar noor baitar gongan. Asou schaa, memar ols tatn darzeiln van Ronach a puach baar niit ganua unt doos meinks ola soon da seen as drina sent gabeisn..-
Maina nona Elsa, abia leimtigar, hott polda anian too van seen oart chreit balsa a groasa peta hott ckoot unt mensa hiat gameachat barsa mear abia raas aichn gongan in sain Ronach. Dein aneitlan van seen haufa gadanckna: “ In schtool hoon ii unt mai tati gapaut, ear ausbendi gamauart unt ii ainbendi, noor is dar olta Todeschk hear gongan schaun:- Tom, meist bool vroa sainan aseitan pravn hontlongar pa diar zan hoom- - Joo, joo, nouch guat asi mai diarli hoon asmar helft-. Asou homar mitt lautar sghleiparaian in schtool gapaut. In longast homar da chia aichn pfiart, in sumar senza in d’olba gongan asou homar darbaila gameik manan unt in schtool haai richtn. Mensa var olba hintar sent cheman saimar nouch a pisl drina pliim unt in schpotn herbast saimar ausar. Afta Schteiln, par Kalada saimar um holz gongan, ols nia lardar hamm zan cheman cnochz. Afta Schurzmoo bont is gongan manan da Gilda van Pans unt da Efa van Sappadin, par Kalada as iis entara djava van Paloni ausar sent aa bisn gabeisn bo da Uliva van Todeschk, da Erminia van Kon unt is Mariali van Sghemar hont gamaat. Memar hiatn saim gongan da Uliva unt da Ida van Todeschk hont olabaila cteipat bal da Uliva hott pahambla da schkarpezz sain pua gamocht bal saina muatar is niit zavriin gabeisn. Anian too hozza ols aichn gabicklt in a baisa zouta unt mita ganoman asa hott gameik da souln sghnain afta taltn. Bartamool, da Ida unt da Uliva hont in chichalan gatonzt unt gjauzt noor honza ona ckoot da zoukl asa goar da schtandlan van pfloschtar ausar hont gazouchn. Afta tiir senza ausar unt oachn gjauzt pan Pans odar in seen as afta Trootn sent gabeisn. Soi sent viil lusti unt guat gabeisn, hont goar bain aichn gatroon asa oln hont gameik an sghluck geim. Indarvria darvoar asmar saim aichn gongan senzami virpaai cheman riafn, homar in kafee zoma gatrunckn noor saimar gongan. An too mai tati riaftmi voar da zait unt sokmar:- Da Uliva unt da Ida sent schuan gongan, haintan pista schpota-. Ii nemi auf unt gea check aichn unt ismar virr cheman as sooi voar main baarn gabeisn. Meni ibara Ronkafizz piin aufn honi cheart hintar puzzn in da losghn unt hoon gamant schpota zan sain. Noor honi aichn geim, gamolchn unt sooi sent earscht cheman:- Poben Elsa, bos hostaden ckoot in chopf haintan? Pista schuan asou vria aichar?-. Mai tati hozzi ckoot pfalt unt hottmi chriaft cbint nooch da mitanocht, schau noor bi vria asi piin aichn. Unt a mool, in chriazait, pini laai a diarli gabeisn meni mitt main tati piin aichn unt hintarn schtool van Pans is a taicar saldoot nidaroon gabeisn, a schia moon asa noor beck hont pfiart unt aniada mool asi seem virpaai piin gongan honin olabaila gapetat.
Gabenedait scholatn da zaitn van Ronach sainan!”
Unt hiazan haum bosi da Fina van Pans gadenckt darviir:” In Ronach saimar guat pliim, ananondar homarsi ckolfn, saimar hiatn gongan min chia, noor gamolchn unt ausar gatroon da milach in da lattaria. Um viara indarvria saimar schuan aichn, goar ckropfn homar drina gachoucht ii, da Ia, da Olga van Todeschk. Ibarool ismar gongan manan goar afta Schurzmoo, afta Cklapfa is gongan manan da Este van Bar unt is Gittl van Kampananglan. Noor homar umin zungan unt gjauzt in seen as afta Trotn sent gabeisn unt sooi hont bidar hintar gompartat. Is viil toul gabeisn laai asmar is bosar va herumpn hoom gamuast aufn troon bal oum is ckans gabeisn, virn viich homar da vaschka ckoot. Schoon as za bait iis sustar tati nouch aichn gianan”.
Noch dein gadanckna is niit zan vargeisn zan rein van seen vlaisin chindar as anian too aichn sent gongan in Ronach schuan vartoos in mist auf zan neman pa soiarn schtala unt aufn troon pis par Kalada unt untara Bont noor senza ausar in da schual unt nochmitoo bidar aichn da milach neman in da lattaria zan troon. Boffara leim asa hont gamocht ovar sent glaich mear vroa gabeisn abia da chindar va hiaz asmar niit darschoft nizz zan tuanan.
Unt hiaz ibartrogi maina gadanckna van seen himblischn oart asmar cuischn unsara pearga hoom.
Va dahama saimar schuan vartoos beck gongan aichn zan cheman in zait on zan heim zan manan unt, memar da chia drina hott ckoot ismar nouch vriarar abeck gongan bal is gabeisn zan vuatarn, hintarpuzzn, melchn unt ausar cheman in zait in da lattaria zan troon da milach. Da raas is lonck gabeisn ovar hott churz gadaicht bal van anian eikalan odar schtickl beig is eipas gabeisn zan hearn darzeiln unt in sumar, men da oldargotinga reaslan ausar hont cpeacht van maiar odar van chlapfa, sent gabeisn zan learnan da namatar van anian unt vir boos asa sent boarn gapraucht aa, abia is oldargotinga groos.
Var Aisnan Pruka aichn, pis entarn Mauarach honi olabaila soarga ckoot virpaai zan gianan bal oubarn beig aichn sent an haufa chlapfa gabeisn groas abia da haisar, untarn beig hottmar ols cherznchrood oachn zeachn pis in pooch, is virr cheman virpaai zan gianan in a pferlicha chlupa ona ausgong. Oubarn Mauarach an too, da eltarn hontmar gazak da Bont van Taivl, asou hast da see bont as seem droubar iis reachtar hont aichn bearz. Semoum avn chlopf, nouch in haint sichtmar a schauvl:- Sichta semoum- honzamar zok- da see is da schauvl van taivl asar seem hott aufcteilt af saina hama, noor muasmar check virpaai gianan darvoar asar ausar schprink-. Biil odar niit seem pini virpaai gloufn unt nia aufncauk var soarga in taivl zan seachn. Va seem ismar aichn cheman in Palgroom bo olabaila da Maria van Nikanoasch is gongan manan unt bo dar Nik van Poi hott ckoot sai biart zan pauan noor honzin niit zua gloosn unt hozz drina gapaut avn Chnouvlachpoun. In Palgroom honzamar olabaila darzeilt as da gruam sent gabeisn bosa cholch hont gaprent, is glaicha honza hervoara in Mauarach aa gatonan. Af Seabl is nouch voar joarn ana gabeisn asa hont oochrisn mensa ols noj hont gapaut. Vriar va hervoara van Leck pis aichn pan biarzhaus is a gonzis erlans balli gabeisn unt darcuischnt is a beigl virpaai gongan. Hearn rein bisa in cholch hont gaprent is eipas schians gabeisn asi nia hoon vargeisn unt polda, polda dencki av an too eipas oar zan schraim va dear oarbat aa. Van Palgroom ismar aichn cheman avn Earschn Triit unt aufn, da maistn mool, ibara Ronkafizz unt pan Ronachschtaan, bo is gazichn da grenz var Gamaan, saimar aufckoltn a pisl rostn unt in otn ziachn.
Memar virpaai saim gongan pan schtala van Pans homar nidar gatonan in fiaschko bain odar da schtricka asuns da Gilda van Pans cnochz mita hott geim aichn zan troon bal sii hott olabaila zok:- Maina vinfundart darziacht niit ols-. Da vinfhundart is niit da maschiin gabeisn, naar da cjarosghula asa asou hott ckasn. Schian lonzum saimar pan unsarn schtool aufn cheman unt dareimst asi maina lait hont chrichtat ii piin zeisn untara eischa as seem voroon is gabeisn unt hoon gaboartat pan haai zan gianan... geat baitar


< Torna agli articoli del n. 37