Hiaz is ceachn bos niamp va Tischlbong unt va Chlalach hiat gabolat as ceachn tuat, ovar oubarn Goot meikmar nitt gianan unt mar muast onneman ols bosaruns zuar schickt. In monti indarvria uma holbazbelva unsar Gaistligar dar Don Attilio is in ziin gongan unt un mittoog isar ctoarm. Voar a monat unt a holbis hottar da leista mool da meis gamocht af Tischlbong unt hoom in leistn kafee gatrunckn pan Beec zoma min Angelo dar moon var Irene. In seeng sunti hottarsi nitt a mool ckeart zan preiding va lautar viil ruka bearn asar hott ckoot, unt bi ear hott gamant unt hott schtudiart af da artrosi in ruka paan, ovar bimar noor hott zeachn dar bearn is viil ergar gabeisn polt asin a tumoor afta lungl iis ckeman. Da docktara senant nitt a mool drauf ckeman bosar hiat gameik hoom asaruns hott glosn vir olabaila unt hott asou da zbaa dearfar laar glosn unt da lait as nitt honant gabelt glaam asaruns charaat hiat glosn vir olabaila. A mool hottmar zok: “Ctoarm a Pops mockmar anondarn”, ovar in haintigis toog is niamar asou. An Pops darmochnza in ola da moniar polt as viil Kardinai senant ovar Gaistligara vir unsara dearfar senant biani men nitt chana bal biani senant as in haintigis toog da vokazion honant in Gaistligar zan mochn. A herz preatl, honant da oltn zok, in Gaistligar zan mochn, polt as nitt asou laichta iis mitt ola da lait zan hoom zan tuanan, ovar dar Don Attilio is andar van seeng Gaistligara gabeisn as vir is ckeman bar gapoarn anpflais in Gaistligar zan mochn unt as niks ondarscht hiat gameik mochn. Ear hott ols ckoot va Gaistligar, in glaub ibar ols, bal ona in seeng tuatmar niks, unt ear hottin groas ckoot deing glaib. Da gamiatlickait mitt ola da lait asar hott ina chircha zeachn unt da seeng asa ibara beiga hott pakeink, vir-iin senant ola glaich gabeisn unt mitt ola hottar gearn ckreit. Ola da seeng as senant mitt-iin ina schual gabeisn honant zok asar dar pravasta bar gabeisn van gonzn scheminari, maista in teologia as viil hoarta is vir ola, ovar ear is zareacht ckeman da lait zan pataicn min bartar as lai ear is zareacht ckeman hear zan suachn unt hott ols laichta gamocht padaitn da hartarstn cichna van hailling piachar. Ovar an-ondara cicht hott unsarn Gaistligar a groasn Gaistligar gamocht unt is da sega as ear a hearzlichis menc is gabeisn, unt vir-iin senant a mool da chronckn gabeisn unt da oarman, da leistn, da seeng asis hoarta honant ckoot in leim. Hott gadaicht, memarin hott pakeink, a “spaccamonti”, min sain groasn schuachn asar olabaila ona hott ckoot unt groas bidar is gabeisn min longan chitl va Gaistligar asar nouch hott gatroong abia da Gaistligara van-aa mool, ovar bimarin hott gagriast ismar drauf ckeman asar a schtuck proat is gabeisn. Bia dar Veschkul Brollo hott zok mitt sain chopf hiatar gameachat virchn ziachn da greasarsn chirchn van Vriaul, ovar honantin cickt ina dearfar zuachn pan grenzar, in onvong af Codromaz kein da Sghlavania, noor af Canebola olabaila afta seeng saitna, plazza va pearga viil oarma dearfar bo chana oarbat is gabeisn vir da lait unt viil honant gleip udar honanzi zua ckolfn mittar jocht asou viil asi ear aa jagar hott gamocht unt iis min lait gongan jagarn men aa da jocht is gabeisn varpoutn unt viil mool, hottamar darzeilt, senanza entara grenz aa gongan jochtn mensa in Balisch niks honant pacheman zan schiasn. Voar drai joar memarin in sunti hoom gamocht van zbanzk joar af Tischlbong, honi ckoot criim zintarstn artikul, as a doarf ona Gaistligar baar abia a cock viich ona hirta.
Hiaz saimar dodan ona hirta, unt vrongsi bimar hoom zan tuanan bia unt boos, bal is nitt lai da hailiga meis bo dar Gaistligar muast sain, senant viil ondara cichna as hoftnt unt as vaneatn honant var chircha unt van Gaistligar selbar abia is tafn, men aa biani chindar gapearnt, da earschta mool var Schpais unt van Veschkul, is haiartn unt asou baitar, unt nouch mear noatbendig is dar Gaistligar men a chronchis menc iis in doarf unt men iamp schtearp, boo lai a Gaistligar pachimp da richting bartar vir aseitana cich.
Unsadar Don Attilio is dar peisarsta gabeisn vir deing cichna, senant biani Gaistligara as chonant ausar suachn da richtin bartar vir deing situazions unt mochndi peisar hearn unt polda in bearn unt da chronckat aa vargeisn. Hiaz saimar dodan ona hirta bi hoon zok, schtrafmarsi auf unt schaumar ola zoma da chircha virchn zan ziachn unt schaumar nitt unsara doarf praicha oo zan losn cheman.
Gadenckmarin in unsarn petn asaruns a hont gipp, asaruns palaichtn tuat unt asaruns da chroft gipp virchn zan gianan, unt houfmar as dar Veschkul in biani zait anondarn Hear Geiti zuar schickt. In toog van pagreims is da groasa chircha voula gabeisn mitt lait va ola da dearfar van tool unt van Vriaul, noch maina manung va zbaa tausntvinfundart af da draitausnt lait honantin in leistn gruas geim.
Griasmarin asou min oltn gruas va Tischlbong “Galopsus Jesus Christis, in eabickait in gapeet, amen”.
Unt ear beart sichar petn vir ola da seeng asin gearn honant ckoot unt as vaneatn honant in glaub zan varchreiftn.


< Torna agli articoli del n. 37